Laugardaginn 29.október 2011 kl.16 í Sögufélagshúsinu (Fischersundi 3) flytur Viðar Pálsson fyrirlesturinn "Einstaklingurinn og listaverkið: Hugmyndafræðilegar rætur íslenska skólans." Léttar veitingar og umræður að fyrirlestri loknum.

Nokkuð hefur verið rætt um skort á þýðendum af íslensku eftir hina jákvæðu umfjöllun sem kynningin á bókmenntum Íslendinga fékk í Frankfurt. Þar vakti Ísland mikla athygli sem heiðursgestur á bókamessunni á dögunum.

Í tilefni af því að handritasafn Árna Magnússonar er nú á sérstakri varðveisluskrá UNESCO verða flutt erindi um eitt handrit í hádegi annan hvern miðvikudag í vetur. Erindin verða haldin í bókasal Þjóðmenningarhússins frá kl. 12.15 - 12.45.

Jóhannes Bjarni Sigtryggsson verkefnisstjóri á stofnuninni ver doktorsritgerð sína Málið á Ævisögu Jóns Steingrímssonar föstudaginn 21. október kl. 13. Doktorsvörnin fer fram í hátíðasal aðalbyggingar Háskóla Íslands.

Den Arnamagnæanske kommission - Københavns Universitet

Styrkur til handritarannsókna í Kaupmannahöfn

Ríkisstyrkur Árnastofnunar í Kaupmannahöfn fyrir árið 2012 er laus til umsóknar. Styrkurinn er veittur íslenskum ríkisborgurum til handritarannsókna í Den Arnamagnæanske Samling í Kaupmannahöfn.

Um styrkinn geta sótt fræðimenn, með eða án háskólamenntunar. Styrkurinn er nú um 25.000 danskar krónur á mánuði, auk ferðakostnaðar, og má veita umsækjanda í allt að tólf mánuði. Að jafnaði er styrkurinn aðeins veittur í 1-3 mánuði.

Þorsteinn J. og Bjarni Felix Bjarnason fylgdust með þegar átta skinnhandrit voru flutt til Frankfurt á dögunum á sýningu Gabríelu Friðriksdóttur og hafa birt myndband á vef Sögueyjunnar:

• www.sagenhaftes-island.is/upplestur-manadarins/nr/3152

Afar fátítt er að íslensku handritin séu flutt úr landi og aldrei áður hafa svo mörg íslensk fornhandrit verið sýnd í einu í Þýskalandi. Þýskir fjölmiðlar hafa sýnt sýningunni og handritunum mikinn áhuga.

ORT Í HUNDRAÐ ÁR
Dagskrá með íslenskri tónlist helguð íslenskum skáldum í tilefni 100 ára afmælis Háskóla Íslands Hátíðarsal HÍ 5. október.

Á fyrstu háskólatónleikum haustsins, miðvikudaginn 5. október, flytja Anna Guðný Guðmundsdóttir, píanó, og Sigurður Ingvi Snorrason, klarínetta, verk eftir Atla Heimi Sveinsson, Jón Þórarinsson, Jón Nordal, Hróðmar Inga Sigurbjörnsson og nýtt verk eftir Þuríði Jónsdóttur. Svanhildur Óskarsdóttir les ljóð eftir íslensk skáld með og án undirleiks.

Tónleikarnir hefjast kl. 12.30.

Í dag opnar sýningin „Crepusculum“ í Schirn Kunsthalle Frankfurt þar sem listakonan Gabríela Friðriksdóttir skapar einstæða umgjörð um átta íslensk fornhandrit.

Reykjavík var fimmta borgin í heiminum til að hljóta þann heiður að vera útnefnd Bókmenntaborg UNESCO, og sú fyrsta utan ensks málsvæðis. Fyrir eru í samtökum Bókmenntaborga UNESCO borgirnar Edinborg í Skotlandi, Iowa City í Bandaríkjunum, Melbourne í Ástralíu og Dublin á Írlandi. Bókmenntaborgirnar eru hluti af stærra neti Skapandi borga UNESCO og er Reykjavík 29. borgin til að fá aðild að samtökunum. Upplýsingar má fá á vefsíðu sem komið hefur verið á fót fyrir borgina:

• www.bokmenntaborgin.is

Á næstu dögum verða átta handrit flutt til Þýskalands á sýningu Gabríelu Friðriksdóttur myndlistarmanns í tilefni Bókasýningar í Frankfurt þar sem Ísland er heiðursgestur.

Í Kastljósi í Sjónvarpinu þann 19. september var ágæt umfjöllun um sýninguna og flutning handritanna. Nokkur viðbrögð hafa orðið við þættinum. Margir hafa glaðst yfir verðmætum handrita og fyrirhugaðri sýningu en sumir undrast meðferð skinnhandrita sem mynduð voru, þá sérstaklega að menn meðhöndluðu þau án þess að nota hanska.

Heimasíða stofnunarinnar er lítillega löskuð þessa dagana. Allur texti er á sínum stað en útlitið er stundum annað en vant er, myndir horfnar af sumum síðum og tenglar virka ekki alltaf.

Við biðjum gesti síðunnar að vera þolinmóðir en unnið er að lagfæringum. Allar ábendingar og fyrirspurnir má senda til Rósu Sveinsdóttur, rosasve@hi.is.

Næstkomandi fimmtudag, 15. september, munu Íslendingar afhenda Norðmönnum sérútgáfu Hins íslenzka fornritafélags á Morkinskinnu við hátíðlega athöfn í Oslóarháskóla. Um er að ræða 2. hluta af þremur í þjóðargjöf Íslendinga til Norðmanna í tilefni af 100 ára afmæli endurreists konungsveldis í Noregi árið 2005. Katrín Júlíusdóttir iðnaðarráðherra mun afhenda gjöfina, en við henni tekur Anniken Huitfeldt, menningarmálaráðherra Noregs.