Stofnun Árna Magnússonar í íslenskum fræðum hefur umsjón með kennslu í íslensku og þjónustu við háskólakennara í íslensku við erlenda háskóla af hálfu íslenskra stjórnvalda.
Íslensk stjórnvöld styðja við íslenskukennslu í eftirfarandi löndum.

Icelandic Online er öllum opið og er aðgangur ókeypis. Námskeiðið er einkum ætlað erlendum háskólanemum en einnig öðrum sem áhuga hafa á íslensku máli og menningu, bæði erlendis og hér á landi. Nemendur sem taka þátt í sumarnámskeiðum í íslensku á vegum hugvísindadeildar og Stofnunar Árna Magnússonar í íslenskum fræðum þurfa að hafa lokið Icelandic Online 1.

Stofnun Árna Magnússonar í íslenskum fræðum og hugvísindasvið Háskóla Íslands standa fyrir sumarnámskeiðum ár hvert í íslensku máli og bókmenntum, sögu og samfélagi. Annars vegar er boðið upp á Nordkursnámskeið ætlað norrænum nemendum og hins vegar alþjóðlegt námskeið fyrir útlendinga sem áhuga hafa á íslensku nútímamáli og menningu.

Sumarskóli í handritafræðum er haldinn á hverju ári af Stofnun Árna Magnússonar í íslenskum fræðum og Árnasafni í Kaupmannahöfn (Institut for Nordiske studier og sprogvidenskab) til skiptis í Reykjavík og Kaupmannahöfn. Þegar námskeiðið er á Íslandi er það haldið í samvinnu við Landsbókasafn Íslands-Háskólabókasafn og Háskóla Íslands. Þetta eru tíu daga námskeið sem kennd eru á ensku. Hvert námskeið er metið til 5 ECTS eininga og getur verið hluti af meistaranámi í íslenskum miðaldafræðum (Medieval Icelandic Studies).

Stofnun Árna Magnússonar í íslenskum fræðum annast umsýslu með styrkjum mennta- og menningarmálaráðuneytis til erlendra stúdenta til íslenskunáms við Háskóla Íslands. Á hverju ári er boðið upp á 17 styrki sem ætlaðir eru erlendum nemendum sem hafa áhuga á að læra íslenska tungu og miðla henni áfram.

Listi yfir bækur um íslenskt mál, menningu og sögu. Hann er einkum hugsaður fyrir erlenda nemendur í íslensku og fyrir þá sem vilja reyna að læra íslensku eða kynna sér íslenska menningu og sögu á eigin spýtur.

Hér má finna margþættan þjóðlegan fróðleik sem safnað var um árið 2000 um Ísland og Íslendinga. Í textanum má m.a. finna ýmislegt um stjórnmál, veðurfar, landafræði, menntamál og lífið í landinu.