Örnefnasafn

Í örnefnasafni Stofnunar Árna Magnússonar í íslenskum fræðum eru geymdar skrár yfir örnefni á flestum jörðum á Íslandi. Elsta skráin er úr fórum Brynjúlfs Jónssonar frá Minna-Núpi og er dagsett 29. október 1910. Hana gerði nafni hans Bjarnason yfir jörðina Framnes á Skeiðum.

Kjarninn í safninu eru skrár yfir örnefni á flestum jörðum á landinu, en einnig eru varðveittar skrár yfir örnefni á mörgum afréttum og svæðum á hálendinu, auk t.d. skráa um nöfn á miðum en örnefnaskrár í örnefnasafni skipta þúsundum. Örnefnaskrárnar eru flokkaðar eftir sýslum og hreppum og tekur safnið mið af þeirri skipan sem var við lýði kringum 1970, áður en sameiningar sveitarfélaga hófust af fullu afli.

Örnefnasafn er mikið notað af almenningi og fræðimönnum, bæði fólki sem byggir jarðir eða tengist þeim á annan hátt, sumarhúsafólki, ferðamönnum, sagnfræðingum, málfræðingum, landfræðingum, þjóðfræðingum og mörgum öðrum.

Örnefnaskrár í opnum aðgangi

Á vefnum nafnið.is verða gögn um nöfn af ýmsu tagi aðgengileg á einum stað. Í fyrsta áfanga verkefnisins er unnið að skráningu örnefnasafns Árnastofnunar og það gert aðgengilegt og leitarbært. Verkefnið var unnið að frumkvæði sérfræðinga Árnastofnunar í nafnfræði sem hafa umsjón með og bera ábyrgð á vefnum.

Opna vef

Bæjatal

Í Bæjatalinu er hægt að leita að staðsetningu bæja í hrepp og sýslu. Upplýsingar fylgja um sveitarfélag sem bæirnir tilheyrðu árið 1970 og sem þeir tilheyra núna.

Opna

Hreppar og sýslur

Í Yfirliti yfir sýslur og hreppa er að finna lista yfir hreppa á Íslandi eins og þeir voru um 1970. Annars vegar er listanum raðað eftir sýslum og hins vegar eftir stafrófsröð.

Opna