Á íslenskusviði eru stundaðar rannsóknir í máltækni með áherslu á málleg gagnasöfn, málheildir, og greiningu og hagnýtingu á þeim. Einkum eru stundaðar rannsóknir á færni myndandi mállíkana til að búa til texta, hvort sem það felur í sér að mæla nákvæmni þýðingarvéla eða smíði málfræðilegra prófa fyrir mállíkön. Þá er máltækni hagnýtt til að styðja við aðrar rannsóknir og starfsemi stofnunarinnar, s.s. við orðabókargerð og málrannsóknir, greiningu á eldri tal- og textagögnum, og við uppbyggingu mállegra gagnasafna. Stofnunin gefur út einmála og samhliða málheildir og sinnir þróun á framsetningu þeirra og sjálfvirkum aðferðum við leiðréttingar, síun og greiningu á málgögnum. Rannsóknirnar eru liður í máltækniáætlun stjórnvalda.