Þrettán nemendur í norrænum fræðum og íslensku við Humboldt-háskóla í Berlín heimsóttu Árnastofnun á dögunum. Ferð þeirra til Íslands var farin í tengslum við námskeið í hlaðvarpsgerð þar sem áhersla er lögð á talþjálfun, framburð og einkenni talmáls. Í námskeiðinu hafa nemendurnir unnið nokkur hlaðvörp í hópum um ólík efni sem tengjast Íslandi og íslenskri menningu.

Út er komin veforðabókin Samtalsorðabók sem er tilraunaverkefni á orðfræðisviði Stofnunar Árna Magnússonar í íslenskum fræðum. Tilgangur verkefnisins er að setja munnleg samskipti í öndvegi og sýna talmáli þá athygli sem það á skilið. Orðabókin lýsir raunverulegri notkun í nútímaíslensku og því er ekki gert upp á milli gamalgróinna og viðurkenndra orða og nýjunga sem einkum koma fyrir í mjög óformlegu máli ungs fólks. 

Hjá Stofnun Árna Magnússonar í íslenskum fræðum er hafin vinna við nýja íslensk-pólska veforðabók. Orðabókin er tíunda tvímála orðabók Árnastofnunar og er byggð á ISLEX- verkefninu og fleiri orðabókarverkum sem unnið hefur verið að á stofnuninni undanfarin 15 ár. Verkefnið fékk fjárveitingu frá félags- og vinnumarkaðsráðuneytinu og stefnt er að því að opna fyrstu útgáfu orðabókarinnar með tuttugu þúsund uppflettiorðum í lok þessa árs.

Stofnun Árna Magnússonar í íslenskum fræðum auglýsir laust til umsóknar starf sérfræðings á skrifstofu fjármála, tímabundið til eins árs. Fram undan eru miklar breytingar hjá stofnuninni og leitum við að öflugum aðila sem er tilbúinn að taka þátt í breytingaferlinu með okkur. Í boði er áhugavert, krefjandi og fjölbreytt starf á líflegum vinnustað.

Helstu verkefni og ábyrgð 

Jóhannes B. Sigtryggsson fékk framgang í starfi þann 20. desember síðastliðinn. Hann fór úr starfi rannsóknarlektors í starf rannsóknardósents. Jóhannes lauk doktorsprófi í íslenskri málfræði 2011. Hann var ritstjóri Handbókar um íslensku (2011) og ritstýrir nú Íslenskri stafsetningarorðabók og Málfarsbankanum.

Haukur Þorgeirsson hlaut framgang í starfi þann 20. desember síðastliðinn. Hann fór úr starfi rannsóknardósents í starf rannsóknarprófessors á Stofnun Árna Magnússonar í íslenskum fræðum. Haukur hefur skrifað mikið um bragfræði og kveðskap — sérstaklega rímur og dróttkvæði en líka eddukvæði. Hann hefur einnig stundað tölvustuddar mælingar á orðtíðni í íslenskum textum frá fyrri öldum og rannsakað Snorra-Eddu, textafræði og málsögu með því að bera saman texta rúnaristna og dróttkvæða.

Eitt af fjölmörgum verkefnum Árnastofnunar er Risamálheildin svokallaða. Hún inniheldur rúmlega 2.4 milljarð orða sem einkum eru fengin úr textum vef- og prentmiðla, af samfélagsmiðlum og úr opinberum skjölum. Með því að bera saman tíðni orða nýliðins árs og áranna á undan er hægt að kalla fram lista yfir ný orð eða orð sem komu mun oftar fyrir á liðnu ári en árin á undan.