Stofnun Árna Magnússonar í íslenskum fræðum og hugvísindasvið Háskóla Íslands standa fyrir alþjóðlegum sumarskóla í íslenskri tungu og menningu í júlímánuði ár hvert. Námskeiðið er einkum ætlað stúdentum í tungumála- og bókmenntanámi en aðrir sem áhuga hafa á íslensku nútímamáli og menningu eiga þess kost að sækja námskeiðið.

15. febrúar er síðasti dagur til að skila inn umsóknum en sumarskólinn hefst 1. júlí 2025.

Sjá nánari upplýsingar um sumarskólann á íslensku eða ensku.

Maó Alheimdóttir heldur erindi í fyrirlestrasal Eddu 18. febrúar kl. 15–16. Erindið er hluti af fyrirlestraröðinni Annars hugar.

Maó Alheimsdóttir skrifar á íslensku þó að móðurmál hennar sé pólska. Hún er með BA-próf í námsgreininni Íslenska sem annað mál með almenna bókmenntafræði sem aukagrein og er jafnframt með MA-gráðu í ritlist frá Háskóla Íslands. Maó hefur einnig stundað nám í norrænum fræðum við Sorbonne-háskóla í París. Handrit að skáldsögu hennar „Veðurfregnir og jarðarfarir“ hlaut Nýræktarstyrk Miðstöðvar íslenskra bókmennta árið 2021. „Veðurfregnir og jarðarfarir“ kom út árið 2024 og er fyrsta skáldsagan sem frumsamin er á íslensku af höfundi sem lærði íslensku á fullorðinsaldri. Verk eftir Maó hafa birst í tímariti Máls og Menningar, Heimildinni og verið flutt í Ríkisútvarpinu. Maó hefur undanfarið unnið að íslenskri þýðingu á ljóðum Rómaskálds Papúsza fyrir bók sem væntanleg er og verður gefin út hjá Stofnun Vigdísar Finnbogadóttur.

Dr. jr. Davíð Þór Björg­vins­son, lagaprófessor og fyrrum dómari, mun fjalla um fornar lögbækur og gildandi lög í hádegisfyrirlestri í Eddu. Erindið er liður í fyrirlestraröð sem tengd er handritasýningunni Heimur í orðum.

Á sýningunni eru meðal handrita fornar lögbækur, t.a.m. lögbók úr Skálholti. Einnig eru á sýningunni þrjú lögbókarhandrit sem eru ólík að stærð og gerð. Allar varðveita þær lögbókina Jónsbók sem var samþykkt árið 1281. Jónsbók leysti þá af hólmi lögbókina Járnsíðu sem aðeins gilti í áratug. Réttarbætur komu síðan reglulega frá Noregskonungi og var bætt inn í bækurnar eftir þörfum. Jónsbók er sá texti sem varðveittur er í flestum íslenskum handritum enda gilti bókin að mestu fram á 17. öld og enn má finna stakar greinar úr Jónsbók í núgildandi lögum.

Í tilefni af því að þessi handrit eru nú til sýnis mun Dr. jr. Davíð Þór Björgvinsson flytja erindi í Eddu sem hann kallar:

„Fornar lögbækur og dómar“   

Í erindinu mun hann fjalla um nokkra íslenska dóma, sem nýlega má telja, þar sem meðal annars er finna er tilvísanir í fornar lögbækur. Rætt verður um dómana og útskýrt hvernig þessar fornu réttarheimildir eru notaðar, á hvaða sviðum réttarins og hvaða þýðingu þær hafa fyrir úrlausn mála í samtímanum.  

Dr. jr. Davíð Þór Björgvinsson hefur stundað nám í sagnfræði, heimspeki og lögfræði. Hann er fyrrverandi dómari við Mannréttindadómstól Evrópu en er nú prófessor og deildarforseti við lagadeild Háskólans á Akureyri.    

Fimmtudaginn 27. febrúar kl. 13.30–15.30 verður haldið málþing í Eddu til heiðurs Ástu Svavarsdóttur, rannsóknardósents við Stofnun Árna Magnússonar í íslenskum fræðum. Ásta á að baki langan og farsælan starfsferil sem fræðimaður og kennari. Á málþinginu munu samstarfsmenn og vinir stíga á stokk og flytja erindi sem tengjast Ástu og starfi hennar á Orðabók Háskólans og Árnastofnun. 

Til máls taka: 

Einar Freyr Sigurðsson
Eiríkur Rögnvaldsson
Guðrún Þórhallsdóttir
Halldór Guðmundsson
Höskuldur Þráinsson
Jón Hilmar Jónsson
Kristín Bjarnadóttir
Kristín Svava og Ása Bergný Tómasdætur
Kristján Árnason
Margrét Jónsdóttir 

Að málþingi loknu býður Árnastofnun upp á léttar veitingar.

Ingunn Ásdísardóttir þjóðfræðingur fjallar um jötna og aðrar vættir.

Nánar um fyrirlesturinn síðar.

Emily Lethbridge heldur hádegisfyrirlestur um örnefni í Íslendingasögum.

Fjöldi örnefna í Íslendingasögunum tengjast persónum og atburðum. Skýringar sem fylgja örnefnum veita okkur innsýn í sköpunarferli þessarar bókmenntategundar. Sumar skýringar eru að öllum líkindum leifar af munnmælum (um nákvæman aldur þeirra liggur þó ekkert ljóst fyrir) en aðrar eru hugsanlega tilbúnar eða uppspunnar (og var landnámsfólk eða atburðir á þann hátt bókstaflega lesið upp úr landslaginu). Þegar samansafn örnefna með skýringum er skoðað koma ýmis mynstur í ljós; mynstrin geta gefið okkur vísbendingar um margt, ekki síst um samfélagsleg viðhorf og forsendur. Í þessum fyrirlestri verður reynt að greina og lesa út úr örnefnaskýringum í sögunum þar sem athyglinni er sérstaklega beint að örnefnum sem tengjast konum.