Ríkisstyrkur Árna Magnússonar (Det Arnamagnæanske Statsstipendium) fyrir árið 2023 er laus til umsóknar. Styrkurinn er veittur íslenskum ríkisborgurum til handritarannsókna í Árnasafni í Kaupmannahöfn.

Silvia Hufnagel starfar við rannsóknarverkefnið Pappírsslóð rakin. Efniviður íslenskra bóka og handrita frá 16. og 17. öld — frá pappírsframleiðslu til bókasafna.

Hér segir hún frá rannsókn á uppruna elsta íslenska vatnsmerkisins.

Ársfundur EFNIL (European Federation of National Institutions of Language) var haldinn í Vilnius 11.−13. október. Jafnframt fór þá fram hin árlega ráðstefna samtakanna og var aðalumræðuefnið fólksflutningar og tungumál. Fjallað var um máltileinkun og aðlögun að málaðstæðum í nýju landi, margar hliðar á fjölmála málaðstæðum og um stöðu og afdrif tungumála þeirra sem flust hafa búferlum í stórum stíl milli landa. Óhætt er að segja að fyrirlestur frá Úkraínu um málaðstæður á hinum hernumdu svæðum, og tungumál sem tæki í stríðsátökum, hafi hreyft við ráðstefnugestum.

Samúel Þórisson, tæknimaður CLARIN á Íslandi og Starkaður Barkarson landsfulltrúi tóku þátt í árlegri CLARIN-ráðstefnu sem haldin var í Prag 10.−12. október. Einnig ber að nefna að Jón Friðrik Daðason, doktorsnemi við Háskólann í Reykjavík, kynnti doktorsverkefni sitt á ráðstefnunni. Auk þess að sitja fyrirlestra sem spönnuðu vítt svið, en tengdust þó ávallt þeirri þjónustu sem CLARIN veitir, sátu Starkaður og Samúel fundi þar sem ýmis mál er varða starfsemi CLARIN voru rædd.

Út er komin bókin Sýnisbók þess að Ísland er ekki barbaraland

Stofnun Árna Magnússonar í íslenskum fræðum setti upp bás á Vísindavöku Ranníss 2022. Að þessu sinni stóðu Emily Lethbridge, rannsóknardósent á nafnfræðisviði stofnunarinnar, og Fjóla K. Guðmundsdóttir vefstjóri vaktina í Laugardalshöll. Gestum og gangandi gafst færi á að kynna sér ýmislegt sem viðkemur starfsemi nafnfræðisviðs Árnastofnunar.

Föstudaginn 23. september hélt Branislav Bédi, verkefnisstjóri á alþjóðasviði Stofnunar Árna Magnússonar í íslenskum fræðum, fyrirlestur um tól og tæki sem aðstoða við kennslu í íslensku sem öðru máli og þar á meðal vefnámskeiðið Icelandic Online  sem er notað í tengslum við sumarskóla í íslenskri tungu og menningu, sem stofnunin skipuleggur árlega í samstarfi við Háskóla Íslands. Sumarskólann sækja erlendir nemendur sem koma til landsins til að læra íslensku og fræðast um íslenskt samfélag.

Laugardaginn 17. september var sett upp handritasmiðja í Bókasafni Garðabæjar. Haukur Þorgeirsson, rannsóknardósent á handritasviði Árnastofnunar, fræddi gesti og gangandi um heim handritanna og verkfæri miðaldaskrifara. Um tuttugu manns sóttu smiðjuna og börn jafnt sem fullorðnir spreyttu sig á því að munda fjaðurpenna og skrifa á bókfell.