Íslenski málbankinn verður opnaður fimmtudaginn 4. september kl. 12.10–12.40 í fyrirlestrasal Eddu, Arngrímsgötu 5.

Á dagskrá verða stuttar kynningar þar sem fjallað verður um bankann og mikilvægi hans fyrir rannsóknir og máltæknistarf á Íslandi.

Í boði er hádegishressing í lok dagskrár.

Um Málbankann

Málbankinn er nýtt vefsvæði á vegum Árnastofnunar sem hefur það að markmiði að miðla málgögnum fyrir íslensku á öruggan og aðgengilegan hátt.

Notendur geta sótt gögn í bankann en helstu markhópar eru m.a. fræðimenn og stúdentar í hug- og félagsvísindum sem rannsaka íslenskt mál og samfélag, og forritarar sem vilja nálgast gagnasöfn, líkön og verkfæri sem tengjast máltækni.

Málbankinn er á vegum CLARIN-þjónustumiðstöðvar sem rekin er á Árnastofnun í samstarfi við sjö aðrar stofnanir: Háskóla Íslands, Háskólann í Reykjavík, Landsbókasafn Íslands – Háskólabókasafn, Þjóðskjalasafn Íslands, Íslenska málnefnd, Ríkisútvarpið ohf. og Almannaróm – miðstöð máltækni. CLARIN-þjónustumiðstöðin hefur starfað frá 2017.

Dagskrá

• Starkaður Barkarson: Þú tekur aldrei of mikið út úr Málbankanum – CLARIN á Íslandi opnar banka
• Anna Nikulásdóttir: Máltækni í Íslenska málbankanum
• Helga Hilmisdóttir: Málbankinn fyrir fræðimenn – um varðveislu og miðlun rannsóknargagna

Fundarstjóri: Steinþór Steingrímsson

Viðburður á Facebook

Sigurðar Nordals fyrirlestur er haldinn 14. september ár hvert en Sigurður fæddist á þessum degi árið 1886.

Fyrirlesari að þessu sinni er Sigríður Hagalín Björnsdóttir, rithöfundur og fréttakona. Sigríður fjallar um plágur, prentverk og algóritma, heimsslit og gulltöflur og óendanlega og óbærilega framfaraþrá mannsandans. 

Nánar um fyrirlesturinn síðar.

Kristín Ragna Gunnarsdóttir, teiknari og rithöfundur, segir frá gerð Njálurefilsins sem hún hannaði og teiknaði og fjöldi manns tók þátt í að sauma.

Fyrirlesturinn er haldinn í tengslum við sýninguna Heimur í orðum.

Viðburður á Facebook

Málþing í tilefni af útkomu bókarinnar Danslög Jónasar

Í bókinni Danslög Jónasar eru gefin út lög fyrir fiðlu sem Jónas Helgason (1839–1903) skráði í litla nótnabók sem nú er varðveitt í handritasafni Landsbókasafns Íslands – Háskólabókasafns. Birtar eru ljósmyndir af handritinu í raunstærð ásamt aðgengilegum uppskriftum allra laganna í því.

Jónas og Helgi, bróðir hans, voru vinsælir fiðluleikarar og danstónlistarmenn í Reykjavík á sjöunda áratug 19. aldar og bókin inniheldur einnig upplýsingar um Jónas, alþýðufiðluleik á Íslandi og sögu dansmenningar 19. aldar í Reykjavík. Sumt af þessu verður einnig fjallað um á málþinginu ásamt því sem talað verður almennt um alþýðuhljóðfæri og þjóðlagatónlist.

Markmið útgáfunnar og málþingsins er að kynna ríkan menningararf sem birtist í Danslögum Jónasar með ósk um að hún veiti tónlistarfólki innblástur til að halda áfram að spila þessa tónlist á fiðlur og önnur hljóðfæri, tónlistarinnar verði notið og dansað verði við hana.

Málþingið er hluti af dagskrá þjóðlistahátíðar Vökufélagsins.

Fyrirlestrar

• Rósa Þorsteinsdóttir: Alþýðuhljóðfæri á Íslandi
• Mette Vårdal: When does culture become national? About innovation, assimilation and tradition in folk culture
• Herdís Anna Jónsdóttir: Fiðlumenning í Suður-Þingeyjarsýslu
• Vegar Vårdal: How I understand the fiddle recordings in Ismus in light of the Nordic folk music
• Atli Freyr Hjaltason: Þjóðdansar eða menningararfur. Dansmenning 19. aldar