Ari Páll Kristinsson rannsóknarprófessor hóf störf árið 1990 á Íslenskri málstöð sem var ein þeirra fimm stofnana sem urðu að sameinaðri Stofnun Árna Magnússonar í íslenskum fræðum árið 2006. Ari Páll gegndi starfi forstöðumanns Íslenskrar málstöðvar 1996–2006 en við sameininguna varð hann stofustjóri málræktarsviðs nýrrar Árnastofnunar.
Hann sinnir t.a.m. málfarsráðgjöf, ritstjórn og leiðbeiningum um málnotkun, situr í ritstjórn vefgáttarinnar málið.is og á margvísleg samskipti við innlendar og erlendar stofnanir og fræðimenn.
Rannsóknir Ara Páls hafa undanfarið einkum beinst að málstefnu á Íslandi og víðar; málstýringu, málnotkun og málviðhorfum.
Meðal rita Ara Páls eru kennslubókin The Pronunciation of Modern Icelandic (3. útg. 1988), Handbók um málfar í talmiðlum (1998), leiðbeiningarritið Orðmyndun. Um leiðir til að auka íslenskan orðaforða (2004), doktorsritgerðin „Í fréttum er þetta helst.“ Rannsókn á einkennum íslensks útvarpsmáls (2009), íðorðaskráin Tungumálaheiti (2014), fræðslubókin Málheimar: Sitthvað um málstefnu og málnotkun (2017) og fjölmargir bókarkaflar og tímaritsgreinar (sjá ritaskrá).