Veturliði Óskarsson flytur fyrirlestur í tengslum við sýninguna Heimur í orðum í fyrirlestrasal Eddu.

Í erindinu verður einkum hugað að einu af elstu handritum Grettis sögu, skinnhandriti frá um 1500 sem varðveitt er í háskólabókasafninu í Uppsölum.

Þetta handrit er einmitt á handritasýningunni í Eddu og er eitt fimm merkilegra handrita sem fengin voru að láni frá Uppsölum og Stokkhólmi síðastliðið vor.

Veturliði hyggst rekja sögu handritsins og segja frá skrifara þess um leið og hann rifjar svolítið upp efni Grettis sögu.

Viðburður á Facebook.

Vökufélagið efnir til málþings í Eddu í samstarfi við Árnastofnun. Málþingið er fyrsti viðburður Vöku þjóðlistahátíðar og ber yfirskriftina Hvað er á seyði?

Hvað eru „þjóðlistir“ og hver er staða þeirra hér á landi og í alþjóðlegu samhengi? Hvert er hlutverk áhugafólks og sérfræðinga? Hvaða hlutverki gegna sögur og söngur í þjóðfræðisöfnum? Hvernig tengja lifandi hefðir fortíð og nútíð? Hvað getur gervigreindin gert fyrir okkur?

Þessar spurningar tökum við til umræðu á þjóðlistaþinginu. Við leiðum saman þjóðlagatónlistarfólk, handverksfólk, þjóðdansara, kvæðamenn og fræðafólk, auk fulltrúa annarra hópa sem tengjast þjóðlistum á Íslandi.

Dagskrá

Söngurinn og sögurnar
Rósa Þorsteinsdóttir, þjóðfræðingur hjá Árnastofnun og stjórnarmaður í Kvæðamannafélaginu Iðunni

Milli fortíðar og nútíðar. Lifandi hefðir, þjóðhættir og þjóðlistir
Sigurlaug Dagsdóttir, sérfræðingur á Þjóðháttasafni Þjóðminjasafns Íslands

Þjóðlistir í norrænu samhengi
Atli Freyr Hjaltason, þjóðfræðingur og þjóðdansari

Mannleg samskipti – það sem gervigreindin getur ekki gert fyrir okkur
Sigurður Halldórsson, prófessor við tónlistardeild Listaháskóla Íslands

Í lok málþingsins fara fram pallborðsumræður um stöðu þjóðlista. Auk fyrirlesara taka þar þátt Helga Maureen Gylfadóttir, deildarstjóri hjá Borgarsögusafni Reykjavíkur, Bendt Pedersen, formaður Þjóðdansafélags Reykjavíkur, og Hilmar Hjartarson, harmonikkuleikari og fyrrverandi formaður Félags harmonikuunnenda í Reykjavík.

Umræðustjóri er Kristinn Schram, dósent í þjóðfræði við Háskóla Íslands.

Allir velkomnir og aðgangur ókeypis.

Allar upplýsingar um hátíðina má finna á www.vakareykjavik.is og á samfélagsmiðlum Vökufélagsins.

Nánar um hátíðarviku á Facebook.

Sigurðar Nordals fyrirlestur er haldinn 14. september ár hvert. Fyrirlesari að þessu sinni er fornleifafræðingurinn Birna Lárusdóttir.

Efni fyrirlestrarins

Örnefni hafa löngum haft áhrif á afstöðu okkar til landslags og sögu.

Markviss söfnun þeirra hér á landi hófst snemma á 20. öld en örnefnalýsingar bera þess oft merki að vera flókin samsetning margra sjónarhorna, enda verða nöfnin til og eru notuð í samfélagi manna sem er margbrotið í tíma og rúmi.

Sum varðveitast í munnlegri geymd eða á prenti og önnur hafa horfið eða mjakast í bakgrunninn í flóknu framvinduferli.

Surtsey reis úr hafi haustið 1963 en þar gefst einstakt færi á að rannsaka nafngiftir svo að segja frá fyrsta degi og rekja ferli örnefna í samhengi við landnám og dvöl mannsins í eynni.

Hér verður sagt frá því hvernig nýtt land varð til og öðlaðist merkingu, m.a. með örnefnum. Byggt er á margvíslegum rannsóknum höfundar bæði á vettvangi í Surtsey og á greiningu heimilda af ýmsu tagi, m.a. varðveittra gestabóka úr eynni.

Nánar um fyrirlesara

Fyrirlesturinn byggir á doktorsritgerð Birnu í landfræði við Háskóla Íslands, en vörnin fór fram í mars 2026. Birna sat í rannsóknarstöðu Sigurðar Nordals við Árnastofnun um þriggja ára skeið meðan á náminu stóð.

Hún er með MA-próf í fornleifafræði og BA-próf í íslensku og hefur sinnt margvíslegum störfum sem varða minjar og menningarlandslag. Hún hefur starfað við fornleifarannsóknir um árabil hjá Fornleifastofnun Íslands ses. auk þess að ritstýra Árbók fornleifafélagsins um nokkurra ára skeið. Hún er aðalhöfundur og ritstjóri bókarinnar Mannvist sem kom út hjá forlaginu Opnu 2011.

Auk þess að taka þátt í rannsóknarverkefnum starfar hún hjá Minjastofnun Íslands um þessar mundir og sem formaður faghóps 1 í rammaáætlun auk þess að rita pistla í Bændablaðið.

Viðburður á Facebook.

Tónleikarnir fara fram á bókasafninu í Eddu og eru þeir fyrstu í tónleikaröð sem nefnist Ex Libris. Aðgangur er ókeypis.

Sigurgeir Agnarsson sellóleikari leikur verk eftir frændurna Huga Guðmundsson og Hafliða Hallgrímsson.

Verkin sem leikin verða eru Coniunctio eftir Huga og Solitaire II, op. 58 eftir Hafliða en þau voru samin fyrir Sigurgeir og fyrstu sólóplötu hans – Nánd – sem kom út hjá Crescendo haustið 2025.

Platan hefur fengið afar lofsamlega dóma og umfjöllun og var tilnefnd til Íslensku tónlistarverðlaunanna sem plata ársins 2025. Nánd kom nýverið út á vínylplötu í söfnunarútgáfu í aðeins 100 númeruðum eintökum.

Nánar um flytjandann

Sigurgeir Agnarsson hefur átt farsælan og fjölbreyttan feril sem flytjandi, kennari og skipuleggjandi margvíslegra tónlistarviðburða.

Hann hefur verið fastráðinn hjá Sinfóníuhljómsveit Íslands um árabil og hefur verið leiðari sellódeildar hljómsveitarinnar síðan 2017. Hann hefur margsinnis komið fram sem einleikari með Sinfóníuhljómsveit Íslands og leikið á ýmsum tónlistarhátíðum, bæði hér á landi og erlendis.

Á árunum 2013–2020 var hann listrænn stjórnandi einnar rótgrónustu tónlistarhátíðar Íslands, Reykholtshátíðar. Hann kenndi við LHÍ til margra ára og hefur verið kennari við Tónlistarskólann í Reykjavík (nú Menntaskóli í tónlist) síðan 2003.

Sigurgeir situr í stjórn Kammermúsíkklúbbsins og er einn af stofnendum og stjórnarformaður alþjóðlegu tónlistarakademíunnar HIMA sem stofnuð var árið 2012.

sigurgeiragnarsson.com
Um plötuna Nánd

Um tónleikaröðina Ex Libris

Verið velkomin að hlýða á kammertónlist í hinum glæsilega bókasal Eddu í vetur.

Í tónleikaröðinni er annars vegar lögð áhersla á samtímatónlist og hins vegar á nýsköpun í flutningi eldri tónlistar, bæði þjóðlegrar tónlistar og barokks.

Allir tónleikarnir fara fram í bókasafni Eddu á laugardögum og hefjast klukkan 12 og standa í tæpa klukkustund.

Smellið hér til að skoða dagskrá vetrarins.

Laugardaginn 26. september eru 110 ár síðan einn ástsælasti teiknari Íslendinga, Halldór Pétursson, fæddist. Hann er meðal annars þekktur fyrir frábærar skopmyndir sem birtust í Speglinum og Morgunblaðinu, myndlýsingar í fjölda kennslubóka og barnabóka, forsíðuteikningar í Vikunni og snjalla túlkun sína á heimsmeistaraeinvíginu í skák sem fram fór hérlendis 1972. Færri vita að Halldór var frumkvöðull í gerð myndasagna sem byggðust á íslenskum fornsögum.

Á árunum 1959 til 1961 birti Morgunblaðið eftir hann og Kristján J. Gunnarsson tvær framhaldsmyndasögur, Njálsbrennu og hefnd Kára og Grettissögu. Þessar sögur hafa nú í fyrsta skipti verið gefnar út í heild sinni á bók hjá Froski útgáfu. Ritstjórar eru Bjarni Hinriksson, Jean Posocco og Jón Karl Helgason en útgáfan hefur notið velvilja og stuðnings frá afkomendum Halldórs og Kristjáns og ritstjórn Morgunblaðsins.

Í tilefni af afmælinu og þessari nýju útgáfu efna Árnastofnun, Félag íslenskra teiknara, Morgunblaðið og Froskur útgáfa til afmælisfagnaðar í Eddu 26. september kl. 13–15. Þar fjalla þau Brynja Þorgeirsdóttir bókmenntafræðingur, Karl Blöndal aðstoðarritstjóri og Stefán Pálsson sagnfræðingur um þessa miklu dýrgripi sem sögurnar tvær eru en einnig verður gestum gefinn kostur á að segja frá kynnum sínum eða sinna af Halldóri og verkum hans. Í kjölfarið verður boðið upp á léttar veitingar.

Hildur Ploder, forvörður hjá Landsbókasafni, flytur fyrirlestur í tengslum við sýninguna Heimur í orðum í fyrirlestrasal Eddu.

Nánari upplýsingar síðar.

Í tilefni af því að vefurinn Ísmús á 25 ára afmæli í ár heldur Árnastofnun í samstarfi við Félag þjóðfræðinga á Íslandi málþing í Eddu laugardaginn 3. október. Þar munu stíga á stokk fræðafólk, tónlistarfólk, kennarar og fleiri sem hafa komið að uppbyggingu vefsins eða nýtt hann í störfum sínum og sköpun.
Vefurinn Ísmús er samstarfsverkefni Árnastofnunar, Landsbókasafns Íslands – Háskólabókasafns og Tónlistarsafns Íslands. Þar má finna upplýsingar um tónlistarsögu Íslands og upptökur úr þjóðfræðisafni Árnastofnunar. Auk þess er Ísmús heimili fyrir gagnagrunnana Sagnagrunn, Ævintýragrunn og óðfræðivefinn Braga.
Í lok málþingsins verður efnt til afmælisveislu með tónlistaratriði.

Dagskrá

14–14.50

Jón Hrólfur Sigurjónsson
Tónlistarsafn Íslands

Terry Gunnell
Sagnagrunnur

Hlé

15.05–16

Þóra Marteinsdóttir, tónmennta- og tónfræðikennari, kórstjóri og tónskáld, Kársnesskóli

Pétur Grétarsson, útvarpsmaður og slagverksleikari

Júlíana Þóra Magnúsdóttir þjóðfræðingur

Þorgerður E. Sigurðardóttir dagskrárgerðarmaður, Rás 1

Dagrún Jónsdóttir og Jón Jónsson þjóðfræðingar, Sauðfjársetur á Ströndum

Viðburður á Facebook