Stjórn Vina Árnastofnunar heldur aðalfund félagsins mánudaginn 13. nóvember 2017 kl. 15.30-16.30 í Norræna húsinu.

Á dagskrá eru venjuleg aðalfundarstörf: 

Kosning fundarstjóra og fundarritara
Skýrsla stjórnar lögð fram
Reikningar lagðir fram til samþykktar
Lagabreytingar
Ákvörðun félagsgjalds
Kosning stjórnar
Önnur mál

Hægt er að gerast félagi á vefsíðu félagsins.

­Nafnfræðifélagið heldur seinni fræðslufund misserisins laugardaginn 11. nóv. nk. í stofu 202 í Odda, húsi Háskóla Íslands, og hefst kl. 13.15.

Ólafur Örn Haraldsson, forseti Ferðafélags Íslands, flytur erindi sem ber yfirskriftina:

Nafngiftir í Friðlandinu að Fjallabaki.

Barnabarnabarn óperuskáldsins Richards Wagners, Eva Wagner Pasquier, kom í heimsókn á Árnastofnun föstudaginn 27. október sl. til að skoða Konungsbók eddukvæða og Snorra Eddu, helstu heimildir óperusveigs langafa hennar um Niflungahringinn.

Vasarė Rastonis hefur verið ráðin forvörður við Stofnun Árna Magnússonar í íslenskum fræðum. Alls sóttu tólf forverðir um starfið, allir erlendir. Fimm umsækjendur voru boðaðir í viðtal sem fór fram gegnum Skype-forritið.

Um næstu helgi verður haldin í Hörpu ráðstefna fyrir fjöltyngda sem ber yfirskriftina Polyglot. Í tengslum við ráðstefnuna stendur Stofnun Árna Magnússonar í íslenskum fræðum fyrir hraðnámskeiði í íslensku fyrir áhugasama en líklegt er að á ráðstefnunni verði margir sem láta sig ekki muna um að bæta íslensku við langan lista þeirra tungumála sem þeir hafa eitthvert vald á.

Orðfræðisvið Árnastofnunar fékk í vikunni heimsókn frá rússneska sendiráðinu í Reykjavík. Sendiherra Rússlands á Íslandi, Anton Vasiliev, kom á Laugaveg 13 og með honum í för voru tveir starfsmenn sendiráðsins, þau Oxana Mikhaylova og Mikhail Zenin. Efni fundarins var kynning orðfræðisviðs á verkefnum sem varða tvær prentaðar orðabækur á milli íslensku og rússnesku, og möguleikar á birtingu þeirra á vefnum.

Mennta- og menningarmálaráðuneytið styrkir árlega nokkra erlenda afburðanemendur til náms í íslensku sem öðru máli. Alþjóðasvið Árnastofnunar heldur utan um þessa styrkþega frá umsókn að útskrift. Að þessu sinni voru níu styrkþegar sem hófu nám í haust frá jafnmörgum löndum (Litháen, Þýskalandi, Frakklandi, Ítalíu, Póllandi, Tékklandi, Rússlandi, Slóvakíu og Bandaríkjunum). Sex nemendur fengu framhaldsstyrk til áframhaldandi náms. Alls eru hér fimmtán nemendur frá 11 löndum.