Helga er málfræðingur sem hefur aðallega áhuga á hversdagslegu talmáli. Hún er ritstjóri Samtalsorðabókar sem er orðabók sem varpar ljósi á orð og orðasambönd sem einkum koma fyrir í talmáli. Undanfarin ár hefur hún beint sjónum að samtölum ungs fólks, m.a. notkun enskra orða í íslensku samhengi. Hún tekur þátt í norrænum og alþjóðlegum rannsóknarhópum sem fjalla um þessi mál og stýrir m.a. norræna netverkinu PLIS (Pragmatic loans in Scandinavian languages).

Meðal annarra verkefna Helgu er að hafa umsjón með talmálsgögnum íslenskusviðs, m.a. hljóð- og myndbandsupptökum af samtölum, og að finna leiðir til að varðveita, miðla og vinna úr þeim. Hún hefur einnig umsjón með talmálssafni Orðabókar Háskólans sem geymir umsagnir fjölmargra heimildarmanna um orð og orðafar í mæltu máli, m.a. um staðbundinn orðaforða og merkingu. Helga er í ritnefnd LexicoNordica, tímariti norrænna orðabókafræðinga.