Laufabrauðshefðir eru ómissandi hluti af jólahaldi margra landsmanna og má lesa um þær á vefnum Lifandi hefðir.

Þjóðháttadeild Þjóðminjasafns Íslands leitar nú eftir frásögnum um laufabrauðsgerð og laufabrauðshefðir. Þjóðminjasafn Íslands hefur skipulega safnað heimildum um lífshætti á Íslandi með því að semja spurningaskrár og óska eftir svörum frá fólki. 

Íslenskt orðanet hefur verið fært í nýjan búning og kemur nú fram í nýrri útgáfu á vefslóðinni ordanet.arnastofnun.is. Efnisgrunnur orðanetsins er enn hinn sami og notendur ganga áfram að þeim upplýsingum um vensl orða og samhengi orðanotkunar sem þeir þekkja frá fyrri gerð. En í nýju útgáfunni er lögð meiri áhersla á myndræna framsetningu og myndrit sem birta heillegri og margþættari mynd af merkingarvenslum einstakra flettna, jafnt stakra orða sem merkingarbærra orðasambanda.

Fimmtudaginn 19. nóvember stóð Stofnun Árna Magnússonar í íslenskum fræðum ásamt íslenskukennurum við erlenda háskóla fyrir menningardagskrá á netinu. Á milli klukkan 14 og 16 að íslenskum tíma heimsóttu fjórir rithöfundar og þrír tónlistarmenn íslenskunema víðs vegar um heiminn á Zoom-samskiptaforritinu og spjölluðu á ensku við Brynhildi Björnsdóttur, menningarfræðing og söngkonu.

Nýverið hlaut verkefnið Málnotkunarlegar tökur í norrænum málum og finnsku: samanburður á samskiptamunstri (Pragmatic borrowing in the Nordic languages and Finnish: a cross-linguistic study of interaction) norrænan styrk til að halda þrjár málstofur sem skipulagðar verða af Stofnun Árna Magnússonar í íslenskum fræðum. Helga Hilmisdóttir, rannsóknardósent á orðfræðisviði, fer fyrir hópi fimmtán málfræðinga sem rannsaka upphrópanir, orðræðuagnir og aðrar málnotkunarlegar tökur í norrænum málum og finnsku.

Auglýst er eftir umsóknum um styrki úr Málræktarsjóði.

Stjórn Íslensks-dansks orðabókarsjóðs hefur afhent Stofnun Árna Magnússonar í íslenskum fræðum gjafabréf að öllum eignum sjóðsins. Í stjórninni sitja Guðrún Kvaran (formaður), Hrefna Arnalds, Jón G. Friðjónsson og Vésteinn Ólason. Sjóðurinn á sér óvenjulega sögu og merkilegan tilgang. Árið 1919 fékk Björg C. Þorláksson, sem vann að orðabókinni með Sigfúsi Blöndal eiginmanni sínum frá árinu 1903, þá frumlegu hugmynd að orðabókin ætti „að eiga sig sjálf“, og væri eins konar „bók sem sjálfseigandi stofnun“.

Samtökin EFNIL (European Federation of National Institutions for Language) standa að evrópskri samkeppni þar sem höfundar MA-ritgerða geta keppt um peningaverðlaun. Ritgerðirnar eiga að vera innan efnissviðanna málnotkun, málstefna og margmála umhverfi. 

Möguleika á verðlaununum 2021 eiga ritgerðir sem lokið er, og háskólar hafa tekið gildar og gefið einkunn fyrir, eftir 1. sept. 2019 og fram til ársloka 2020. Umsóknarfrestur er til 31. des. 2020.

Bókin Hugurinn einatt hleypur minn er komin út hjá Félagi ljóðaunnenda á Austurlandi. Í bókinni eru birt kvæði, rímur og vísur eftir Guðnýju Árnadóttur sem fæddist árið 1813 á Valþjófsstað í Fljótsdal og lést 1897 í Hvalnesi í Lóni. Flest kvæðin birtast hér á prenti í fyrsta sinn en þau eru varðveitt í handritum á Austurlandi og í þjóðfræðasafni Árnastofnunar. Þar fer afkomandi Guðnýjar, Inga Þorleifsdóttir (1908–2000), með kvæðin í upptöku frá árinu 1993 og má hlýða á hér.

Íslensk stafsetningarorðabók (ÍS) er komin með eigin vefsíðu. Áður var bókin aðeins aðgengileg innan vefgáttanna málið.is og snara.is.

Íslensk-dönsk orðabók eftir Sigfús Blöndal kom út á árunum 1920−1924 og er þess nú minnst með sýningu í Þjóðarbókhlöðu að öld er liðin frá því að hún kom fyrst út.

Hér má sjá sýningarskrá.