Stofnun Árna Magnússonar sér um námskeið í íslensku fyrir erlenda nemendur og sumarskóla í handritafræðum í samvinnu við Kaupmannahafnarháskóla.

Stofnunin annast styrki Snorra Sturlusonar en þeir eru boðnir árlega erlendum rithöfundum, þýðendum og fræðimönnum til að dveljast á Íslandi í því skyni að kynnast sem best íslenskri tungu, menningu og mannlífi. Einnig annast stofnunin umsýslu styrkja menningar- og viðskiptaráðuneytis til erlendra stúdenta til íslenskunáms við Háskóla Íslands.

Stofnun Árna Magnússonar í íslenskum fræðum býður innlendum og erlendum fræðimönnum og stúdentum, sem vinna að verkefnum á fræðasviði hennar, aðgang að söfnum stofnunarinnar og aðstöðu til rannsókna.
Stofnunin hefur til umráða íbúðir sem erlendir fræðimenn, er koma til Íslands til að sinna rannsóknum, geta fengið afnot af við vægu gjaldi.

Stofnunin býður upp á leiðsögn og fræðslu hjá safnkennara um handritaarfinn og menningarsögu miðalda fyrir skólahópa á öllum skólastigum.

Fræðimannaskrá Stofnunar Árna Magnússonar í íslenskum fræðum inniheldur upplýsingar um á sjöunda hundrað fræðimanna í íslenskum fræðum um allan heim.

Á síðunni eru leiðbeiningar um hvernig megi vitna í efni á vef stofnunarinnar og í gagnasöfn hennar.