Branislav Bédi hóf störf sem verkefnisstjóri á alþjóðasviði Stofnunar Árna Magnússonar í íslenskum fræðum snemma árs 2019. Áður hafði hann lokið doktorsnámi hjá Stofnun Vigdísar Finnbogadóttur í erlendum tungumálum á sviði annarsmálsfræða, gegnt starfi stundakennara í íslensku sem öðru máli við Háskóla Íslands á árunum 2018-2019, og setið í jafnréttisnefnd Hugvísindasviðs Háskóla Íslands frá 2016-2018. Branislav sinnir fjölbreyttum verkefnum innan stofnunarinnar og hefur umsjón með alþjóðlegu sumarnámskeiði í íslensku og Nordkurs-námskeiði í íslensku fyrir norræna nemendur. Hann hefur jafnframt umsjón með sendikennurum í íslenskukennslu erlendis, umsjón með styrkjum í íslensku sem öðru máli á BA-stigi, auk Snorrastyrkja. Branislav hefur einnig með höndum fyrirlestra Sigurðar Nordals sem haldnir eru árlega á vegum stofnunarinnar. Branislav er fulltrúi Íslands í Samstarfsnefnd um kennslu í Norðurlandafræðum erlendis (SNU).