Tvö af ritum þeim sem Stofnun Árna Magnússonar gaf út árið 2015 hafa verið tilnefnd til Menningarverðlauna DV.

Góssið hans Árna í ritstjórn Jóhönnu Katrínar Friðriksdóttur er tilnefnt í flokki fræðirita. Um það segir: „Greinarnar eru tiltölulega stuttar og aðgengilegar og gefa lesendum nýstárlega og fróðlega sýn á handritin. Handritin sem efnislegir gripir og hönnun bókarinnar spila svo fallega saman að tíðindum sætir.“ Sú sem á heiðurinn að hönnun bókarinnar er Sóley Stefánsdóttir. Þá segir jafnframt um ritið í heild: „Góssið hans Árna er ákaflega vel heppnað rit sem færir handritin nær almennum lesendum.“

Margrómað rit Þórunnar Sigurðardóttur, Heiður og huggun - Erfiljóð, harmljóð og huggunarkvæði á 17. öld, er einnig tilnefnt í flokki fræðirita. Um það segir: „Heiður og huggun er merkilegt rit um bókmenntagreinar sem voru vinsælar fyrr á öldum. Þórunn hefur með rannsókn sinni á erfi- og harmljóðum á 17. öld unnið brautryðjandastarf í íslenskum bókmenntarannsóknum [...]  Afar vandað fræðirit og þarft innlegg í íslenskar bókmenntarannsóknir.“ 

Hér má sjá nánar fjallað um tilnefningar til Menningarverðlauna DV (myndina af Þórunni Sigurðardóttur tók Þormar Vignir Gunnarsson).

Hér má taka þátt í kosningu um hver verðskuldar að hljóta Menningarverðlaun DV. Hægt er að kjósa til 9. mars.