Í dag, 11. september, var nýr vefur Árnastofnunar, m.is, opnaður formlega í sal Kvennaskólans af Lilju Dögg Alfreðsdóttur, menningar- og viðskiptaráðherra.
Þessi nýi vefur er sérstaklega hugsaður fyrir yngra fólk og þá sem læra íslensku sem annað mál en hann getur að sjálfsögðu gagnast öllum sem vilja leita sér upplýsinga um íslenska tungu.
Í þessari fyrstu útgáfu er hægt að fletta upp í þremur orðabókum sem Árnastofnun gefur út, Íslenskri nútímamálsorðabók, Íslensk-enskri orðabók og Íslensk-pólskri orðabók. Tvær þær síðarnefndu eru enn í vinnslu en eru nógu langt komnar til að koma að góðum notum.
Auk þess að birta skýringar og dæmi um orð í orðabókunum eru sýndar beygingar orða með upplýsingum úr Beygingarlýsingu íslensks nútímamáls (BÍN). Einnig er hægt að þýða á milli íslensku og ensku með hjálp vélþýðinga.
M.is er að mörgu leyti smærri og einfaldari útgáfa af málið.is, vef sem Árnastofnun hefur haldið úti síðan 2016. Málið.is veitir notendum yfirlit yfir efni sautján gagnasafna og sendir notendur á viðkomandi vefsíður en m.is sækir upplýsingar í fjórar orðabækur og birtir þær allar á einum stað. Notendur eru leiddir áfram og málfræðihugtök eru útskýrð. Mikil vinna hefur verið lögð í að gera útlit og skipulag skýrt og á það einnig við um snjalltæki. Notast var við nýjar lausnir á sviði máltækni við gerð vefjarins og geta notendur til að mynda talað inn orð í stað þess að slá þau inn á lyklaborð.
Stefnt er að því að vefurinn verði þróaður áfram með hliðsjón af þörfum ungs fólks og annarra sem eru að læra íslensku.
![Maður stendur við púlt. Til hliðar við hann er grænn skjár sem á stendur m.is.](/sites/default/files/styles/news_image/public/img_5778_0.jpg?itok=myX-ta2Z)
![Kona í svörtum kjól á sviði. Á bak við hana er grænn skjár og á honum stendur m.is.](/sites/default/files/styles/news_image/public/img_5777_0.jpg?itok=Km4krP0w)
![Bollakökur með grænni skífu ofan á hvítu kremi. Á skífunni stendur "m.is: einfaldar málið".](/sites/default/files/styles/news_image/public/img_5775_0.jpg?itok=-3zEXv1t)
![Maður stendur við hliðina á púlti á sviði. Fyrir miðri mynd er grænn skjár sem sýnir mynd og ógreinilegan texta. Fyrir framan hann situr hópur nemenda við borð.](/sites/default/files/styles/news_image/public/img_5781_0.jpg?itok=fS3Zbn3U)
![Kona stendur fyrir framan svið. Á bak við hana, uppi á sviðinu, er skjár sem sýnir efni á grænum og bláum grunnu. Fyrir framan hana situr hópur ungs fólks við borð.](/sites/default/files/styles/news_image/public/img_5784_0.jpg?itok=KoVODcsE)