Þrettán nemendur í norrænum fræðum og íslensku við Humboldt-háskóla í Berlín heimsóttu Árnastofnun á dögunum. Ferð þeirra til Íslands var farin í tengslum við námskeið í hlaðvarpsgerð þar sem áhersla er lögð á talþjálfun, framburð og einkenni talmáls. Í námskeiðinu hafa nemendurnir unnið nokkur hlaðvörp í hópum um ólík efni sem tengjast Íslandi og íslenskri menningu.
Nemendurnir heimsóttu starfsstöð Árnastofnunar við Laugaveg þar sem þau fengu kynningu á kennslu í íslensku sem öðru máli í gegnum tíðina. Einnig litu þau við í Árnagarði en þar fengu þau að virða fyrir sér nokkur vel valin handrit.
Beeke Stegmann fræðir nemendahópinn um handrit á Árnastofnun.
