Mánudaginn 11. nóvember voru fyrstu miðaldahandritin flutt úr Árnagarði í nýtt öryggisrými í Eddu. Handritin hafa verið geymd í sérstakri öryggisgeymslu í Árnagarði síðan í byrjun 8. áratugarins eða í tæp 55 ár. Handritin voru lengi sýnd í Árnagarði á árum áður en því var hætt fyrir meira en tuttugu árum vegna bágrar aðstöðu og hve ótryggt sýningarrýmið var. Handritasýning Árnastofnunar var í Þjóðmenningarhúsinu við Hverfisgötu á árunum 2002 til 2013 en var lokað vegna öryggismála.
Til að byrja með voru aðeins tuttugu handrit flutt í Eddu en þau koma til með að vera sýnd á nýrri handritasýningu, Heimur í orðum, sem verður opnuð 16. nóvember kl. 14. Þar á meðal má sjá gersemar eins og Konungsbók eddukvæða og Flateyjarbók. Sjá nánar á vef sýningarinnar.
Viðstödd flutninginn var Lilja Dögg Alfreðsdóttir, menningar- og viðskiptaráðherra, auk fréttamanna.
