(Frétt fengin af vef forsætisráðuneytisins 28.10. 2013)

Sigmundur Davíð Gunnlaugsson forsætisráðherra afhenti nú síðdegis Ernu Solberg, forsætisráðherra Noregs þjóðargjöf Íslendinga til Norðmanna í tilefni af því að árið 2005 voru 100 ár liðin frá endurreisn norska konungdæmisins. Fór afhendingin fram við hátíðlega athöfn í Þjóðarbókhlöðunni í Osló.

Þjóðargjöfin samanstendur af fimm bindum og hefur Hið íslenzka fornritafélag haft veg og vanda af útgáfunni. Er um að ræða nýjar útgáfur norskra konungasagna, sem allar voru ritaðar á Íslandi á miðöldum. Árið 2007 kom Sverris saga út og Morkinskinna í tveimur bindum árið 2011. Í haust komu út tvö bindi með Hákonar sögu og Böglunga sögu.

Allar eru sögurnar mikilvægar heimildir um sögu Noregs og voru bindin fimm afhent í viðhafnarútgáfu. Af þessu tilefni hélt forsætisráðherra ávarp um norsku konungasagnirnar og tengsl þeirra við Ísland.

Við afhendingu bókagjafarinnar í Þjóðarbókhlöðunni í Osló. Frá vinstri: Vigdis Moen Skarsten, Erna Solberg forsætisráðherra Noregs, Sigmundur Davíð Gunnlaugsson forsætisráðherra Íslands, Guðrún Nordal forstöðumaður Árnastofnunnar og Þórður Ingi Guðjónsson ritstjóri Íslenzkra fornrita.