Árlegur fundur íslenskukennara sem starfa við erlenda háskóla var haldinn í Reykjavík 11.–14. júní síðastliðinn. Á fundinum voru rædd málefni sem varða íslenskukennslu fyrir erlenda námsmenn og kennsluefni sem stuðlar að því að íslenska sé notuð m.a. í akademísku námi, þýðingum og rannsóknum. Sjónum var sérstaklega beint að því mikilvæga starfi íslenskukennara sem felst í þjálfun nýrra þýðenda og fræðimanna fyrir komandi kynslóðir sem starfa munu sem fulltrúar Íslands við kynningu á íslenskri tungu og menningu erlendis.

Á þriggja ára fresti er ársfundur haldinn í Reykjavík til að gefa kennurum kost á að tengjast aftur íslenskri tungu og menningu og til að heimsækja stofnanir og söfn sem stuðla að miðlun íslenskrar sögu, listar og menningar. Dagskrá fundarins var fjölbreytt. Ráðuneytisstjóri menningar-, nýsköpunar- og háskólaráðuneytis setti fundinn. Gestum frá Kanada var boðið að halda kynningu í tilefni af 150 ára afmæli Nýja-Íslands auk kynningar á íslenskukennslu við háskólann í Manitóba og sendiherra Kanada á Íslandi hélt ræðu um mikilvægi menningartengsla milli landanna beggja. Einnig var íslenskukennaranum í Taívan boðið að kynna íslenskunámskeið sem háskólinn þar í landi býður upp á. Í framhaldi af þessu héldu íslenskukennarar kynningar um stöðu kennslu við þá háskóla sem þeir starfa við í hinum ýmsu löndum. Á málþingi um íslenskukennslu erlendis voru kynntar nýjustu bækur sem munu henta vel við íslenskukennslu á netinu, bókmenntakennslu og kennslu í íslensku sem erlendu máli. Einnig var kynnt verkefni um íslensk-tékkneska veforðabók sem mun stuðla að betri þjálfun nemenda sem hafa tékknesku að móðurmáli.

Kennarahópnum var boðið að heimsækja forseta Íslands á Bessastöðum og voru forsetanum færðar þakkir fyrir að styðja íslenska tungu á heimsvísu. Íslensk stjórnvöld styðja við kennslu í íslensku sem erlendu máli við sautján erlenda háskóla í Evrópu, Norður-Ameríku og Asíu. Stofnun Árna Magnússonar í íslenskum fræðum hefur umsjón með kennslunni fyrir hönd stjórnvalda.