Handrit íslenskra vesturfara

Íslenskir vesturfarar tóku ekki mikið af veraldlegum eigum með sér yfir Atlantshafið. Bækur voru þó undantekning. Árið 2015 hófst verkefnið Í fótspor Árna Magnússonar í Vesturheimi á vegum Árnastofnunar sem hafði að markmiði að finna handrit og bréf vesturfara á söfnum í Kanada og Bandaríkjunum eða í einkaeigu afkomenda þeirra. Handrit vesturfara eru sameiginlegur menningararfur sem mikilvægt er að varðveita. Á þessum vef má skoða myndir af handritunum sem fundust, lesa um fólkið sem tengist þeim og leita að stöðum sem koma við sögu handritanna. Myndirnar á vefnum eru birtar með góðfúslegu leyfi eigenda. Notkun á myndunum í fræðilegum tilgangi eða til persónulegra nota er heimil en hafa þarf samband við eigendur þeirra sé þess óskað að nota þær í öðrum tilgangi.

Um gagnagrunninn

Gagnagrunnurinn inniheldur stafrænar myndir af íslenskum handritum, bókum, bréfum og öðrum skjölum í söfnum og í einkaeigu í Kanada og Bandaríkjunum. Ritstjóri vefsins er Katelin Marit Parsons.