Laugardaginn 4. október nk. heldur Nafnfræðifélagið fræðslufund í Odda, húsi Háskóla Íslands, stofu 106, kl. 13.15. Kristján Eiríksson, cand. mag., flytur erindi sem hann nefnir
Um örnefni í fuglabjörgum
Það er gaman að velta fyrir sér hvernig örnefni verða til og hvað ræður helst nafngiftum á einstökum stöðum og svæðum. Trúlega ráða þrjú eftirtalin atriði mestu þegar stöðum eru gefin nöfn þótt ýmislegt annað komi þar eflaust til.
- Miklu skiptir jafnan hvernig staðir blasa við sjónum manna eða orka á önnur skilningarvit þeirra. Þekkt er til dæmis að sama fjallið heitir ólíkum nöfnum eftir því hvaðan það er séð. Slík nöfn mætti kalla Náttúrunöfn.
- Þá skiptu not manna af landi vitaskuld miklu og þau vinnubrögð sem stunduð voru á hverjum stað ráða nöfnum og orðalagi þegar fjallað er um ákveðin svæði. Slík nöfn mætti kalla Nytjanöfn.
- Einstök atvik og atburðir ráða og nafngiftum, hvort heldur sem þeir eru raunverulegir eða af heimi þjóðtrúar og þjóðsagna. Slík nöfn mætti kalla Sagnanöfn.
Fróðlegt væri að bera saman örnefni á einstökum stöðum eftir því hvers konar nytjar menn hafa af þeim haft og hvers konar vinnubrögð hafa þar verið stunduð. Í fyrirlestrinum verður fjallað um örnefni í fuglabjörgum við Ísland og reynt að flokka þau nokkuð eftir uppruna. Einkum verður tekið mið af örnefnum við Drangey þar sem fyrirlesari þekkir best til.
Öllum er heimill aðgangur.
Nafnfræðifélagið (svavar@hi.is)