Byrjendanámskeið í íslensku sem öðru máli – Bjargir (e. survival course) – var opnað fyrir snjalltæki á vefsvæðinu www.icelandiconline.is í Norræna húsinu 13. september síðastliðinn. Á sama tíma var fyrsta netnámskeiðið í færeysku opnað á vefsvæðinu www.faroeseonline.fo.
Icelandic Online er samstarfsverkefni Hugvísindasviðs Háskóla Íslands, Stofnunar Vigdísar Finnbogadóttur og Stofnunar Árna Magnússonar í íslenskum fræðum en Birna Arnbjörnsdóttir, prófessor í annarsmálsfræðum við Háskóla Íslands, hefur frá upphafi leitt vinnu við þróun og uppsetningu námskeiðanna.
Nú eru íslensku vefnámskeiðin sex talsins. Það fyrsta var opnað til notkunar árið 2004 og það sjötta árið 2013. Námskeiðin eru sjálfstýrð og öllum opin til notkunar á netinu í gegnum sérhannað fjölkerfi til tungumálakennslu.
Í dag eru virkir notendur um 45 þúsund en yfir 160 þúsund manns um allan heim hafa heimsótt námskeiðin frá upphafi. Auk þess að vera notuð í sjálfstýrðu námi eru námskeiðin notuð í skipulögðu námi við Háskóla Íslands og erlenda háskóla þar sem nútímaíslenska er kennd.
Skrá yfir íslenskukennslu erlendis má finna á heimasíðu Stofnunar Árna Magnússonar í íslenskum fræðum.
Fyrir um þremur árum kom forsetaskrifstofan þeirri ósk á framfæri við Kristínu Ingólfsdóttur, þáverandi rektor Háskóla Íslands, að námskeiðin yrðu einnig aðgengileg úr fartækjum. Rektorsskrifstofan lagði fram byrjunarfjárframlag til að sú vinna gæti farið af stað í samvinnu milli verkefnisstjórnar Icelandic Online og tölvunarfræðideildar Háskóla Íslands.
Endurforritunin hófst fyrir tveimur árum og hafa nemar í tölvunarfræði þróað nýtt forrit fyrir námskeiðin undir leiðsögn Patricks Thomas máltölvunarfræðings sem hefur verið verkefnisstjórninni til ráðgjafar allt frá því að fyrsta Icelandic Online námskeiðið var unnið. Nú hefur fyrsta endurforritaða námskeiðið verið opnað til almennrar notkunar auk þess sem vinna við að endurforrita önnur námskeið er hafin.
Auk rektorsskrifstofu og þeirra stofnana sem standa að verkefninu hafa Vinnumálastofnun og Nordplus Voksen og Nordplus sprog áætlanirnar stutt endurforritun Icelandic Online og samstarf verkefnisstjórnarinnar við Fróðskaparsetrið í Færeyjum og Helsinkiháskóla.
