Vilborg Davíðsdóttir rithöfundur og þjóðfræðingur heldur erindi í Eddu á vegum Vinafélags Árnastofnunar miðvikudaginn 9. apríl kl. 17.

Land næturinnar er nýjasta skáldsaga Vilborgar Davíðsdóttur. Þar segir frá ævintýralegri ferð væringja í austurveg en svo kölluðu menn siglingaleiðina úr Eystrasalti suður um fljót Rússlands og Úkraínu. Þar fylgir Vilborg lesendum eftir ánni Dnépur um Garðaríki allt til Svartahafs og Miklagarðs, borgar Konstantíns keisara. Í erindinu segir hún frá rannsóknum að baki sögunni og merkum minjum frá víkingaöld sem komu í ljós eftir að Rússar sprengdu stíflu á Dnépur í Úkraínu sumarið 2023.

Bókin var tilnefnd til Íslensku bókmenntaverðlaunanna. Nánar um Vilborgu á www.davidsdottir.is