Samtökin EFNIL (European Federation of National Institutions for Language) standa árlega að evrópskri samkeppni þar sem höfundar MA-ritgerða geta keppt um peningaverðlaun. Ritgerðirnar eiga að vera innan efnissviðanna málnotkun, málstefna og margmála umhverfi. 

Möguleika á verðlaunum haustið 2022 eiga ritgerðir sem lokið er, og háskólar hafa tekið gildar og gefið einkunn fyrir, árið 2021 og fram til janúarloka 2022. Umsóknarfrestur er til 25. febrúar 2022.

Þrjár MA-ritgerðir hvort ár fá verðlaun. Veittar eru 1.500 evrur fyrir hverja verðlaunaritgerð, auk boðs um fyrirlestur og birtingu á grein. 

 Viðfangsefni í ritgerðasamkeppninni sem koma til álita hjá EFNIL eru einkum á eftirfarandi sviðum:

• að læra tvö tungumál samtímis („bilingual language learning“)
• aðferðir við tungumálakennslu
• málnotkun í margmála umhverfi
• markmið og áhrif málstefnu
• samanburðarrannsóknir á málstefnu
• máltækni og margmála umhverfi
• þýðingar og túlkun

Ritgerðin getur sem best fjallað um íslensku eða Ísland þar sem tungumálið eða tungumálin sem fjallað er um í ritgerðinni mega vera hvaða Evrópumál sem er. En sjálf ritgerðin þarf hins vegar að vera á einhverju opinberu málanna í ESB, t.a.m. ensku, dönsku, þýsku, frönsku, sænsku, spænsku o.s.frv. Ath. að þrátt fyrir útgöngu Breta er enska enn opinbert mál innan ESB, sbr. Írland og Möltu.

Sjá nánar um samkeppnina, mat á ritgerðunum og önnur atriði, á veffanginu http://www.efnil.org/master-thesis-award

Þetta er í þriðja sinn sem keppnin er haldin. Verðlaun ársins 2021 hlutu þessar þrjár meistararitgerðir:

Agnes Kim (Vín) -- Sprache und Gesellschaft im Wandel. Eine historisch-soziolinguistische Untersuchung am Beispiel des Marchfelds (Niederösterreich) im frühen 20. Jahrhundert 
Pia Nilsson (Gautaborg)  -- Språk på museum. En undersökning av allmänhetens och språkexperters syn på ett svenskt språkmuseum 
Anne-Mieke Thieme (Leiden)  -- Multilingual The Hague: Municipal language policy, politics, and practice