Þáttur um þætti
Háskóla Íslands, stofu 101 í Odda
5. desember, kl. 17:00

Miðvikudaginn 5. desember n.k. mun dr. Ármann Jakobsson flytja fyrirlestur á vegum Stofnunar Árna Magnússonar í íslenskum fræðum. Fyrirlesturinn ber yfirskriftina ÞÁTTUR UM ÞÆTTI og lýsir Ármann efni hans þannig: 

Jón Þorkelsson rektor Reykjavíkurskóla (1822–1904) var einna fremstur  íslenskra málfræðinga á 19. öld. Þó að það sé ekki á allra vitorði má  einnig líta á hann sem föður þeirrar bókmenntagreinar sem stundum er  kölluð Íslendingaþættir því að hann gaf fyrstur manna út safn þátta  af Íslendingum, árið 1855. Öllu áhrifameiri hefur líklega verið útgáfa síra Þorleifs Jónssonar á Skinnastað á vegum Sigurðar Kristjánssonar bóksala árið 1904 og ekki má heldur gleyma vinsælli útgáfu Guðna Jónssonar magisters og síðar prófessors frá árinu 1935. Fyrirlesari mun segja frá þessum útgáfum og velta um leið fyrir sér bókmenntagreininni þáttum á gagnrýninn hátt. 

Fyrirlesturinn verður haldinn í Háskóla Íslands, stofu 101 í Odda og hefst kl. 17. Allir velkomnir.

Ármann Jakobsson er dr. phil frá Háskóla Íslands og hefur samið eða ritstýrt sex fræðibókum. Hann gegnir nú rannsóknarstöðu Árna Magnússonar við SÁMÍF og vinnur að útgáfu Morkinskinnu fyrir Hið íslenzka fornritafélag.