Staða forstöðumanns Stofnunar Árna Magnússonar í íslenskum fræðum hefur verið auglýst laus til umsóknar. Staðan verður veitt frá 1. mars 2009, en umsóknarfrestur er til 1. okt. 2008.

Stofnun Árna Magnússonar í íslenskum fræðum er háskólastofnun sem hefur náin tengsl við Háskóla Íslands. Hlutverk hennar er að vinna að rannsóknum í íslenskum fræðum og skyldum fræðigreinum, einkum á sviði miðaldafræða, íslenskrar tungu og bókmennta, að miðla þekkingu á þeim fræðum og varðveita og efla þau söfn sem henni eru falin eða hún á.

Forstöðumaður Stofnunar Árna Magnússonar í íslenskum fræðum skal hafa hæfi sem prófessor á fræðasviði stofnunarinnar að mati þriggja manna dómnefndar sem menntamálaráðherra skipar. Forstöðumaður stjórnar starfsemi og rekstri stofnunarinnar. Hann ræður starfsmenn hennar og er í fyrirsvari fyrir hana. Hann ber ábyrgð á rekstri stofnunarinnar og að starfsemi hennar sé í samræmi við lög og stjórnvaldsfyrirmæli.

Menntamálaráðherra skipar forstöðumann til fimm ára að fenginni umsögn stjórnar stofnunarinnar, sbr. 1. mgr. 5. gr. laga um stofnunina. Skipunartímabil forstöðumanns er frá 1. mars 2009. Launakjör eru ákveðin af kjararáði.

Umsóknir skulu hafa borist menntamálaráðuneytinu, Sölvhólsgötu 4, 150 Reykjavík, fyrir 1. október 2008. Umsókn skulu fylgja upplýsingar um menntun og fyrri störf ásamt ritaskrá. Einnig er óskað eftir að umsækjandi sendi með umsókn 3-5 rit sem hann óskar sérstaklega eftir að leggja fram vegna umsóknarinnar. Upplýsingar um starfið veita Þórhallur Vilhjálmsson, skriftofustjóri í menntamálaráðuneytinu, netfang: thorhallur.-vilhjalmsson@mrn.stjr.is, s. 545-9500 og forstöðumaður Stofnunar Árna Magnússonar í íslenskum fræðum, Vésteinn Ólason, netfang vesteinn@hi.is, s. 525 4011.

Menntamálaráðuneyti, 12. september 2008.